【大跑道】風中勁松充滿新鮮感

第二朝有「恆駿之寶」到大圈出試，由助手踱一圈，外觀冇問題，但火氣不及季初。以下是心水推介：

第2場「果然得」上仗首次跑到2000米，改變跑法跟前，仲要遇上快步速，當然冇運行。計馬前仗田草1800米追勢不俗，進度良好。再看上周四與「直線力山」拍跳不落下風，跳來急勁之餘又冇搶口，今仗除埋眼罩作用正面，可施冷箭。

第5場「風中勁松」加盟柏廐演出準繩，就算近兩仗起步唔快，依然交出不俗衝刺躋身前列。針對連場硬仗，今賽前安排小休近兩個月，亦因為抖夠充滿新鮮感，估計今仗唔會再慢閘，排埋黃金1檔，有望穩守包廂靚位，有力食胡。

第8場「極速奇兵」未能進軍打吡大賽，上仗重整旗鼓出戰首本的谷草一哩，人強馬壯排5檔亦唔差，可惜起步慢了被迫留後，轉最後彎時更走出外疊，結果僅僅飲恨奪亞。「極速奇兵」今次抖夠3星期再跑，賽前跳4課足夠，剛周一出跳雙目炯炯有神充滿氣勢，弗到震！