2024年首位獲選 岳伯仁進入英國賽馬名人堂

英國馬壇方面公布，岳伯仁於本年度獲選進入英國賽馬名人堂(Hall Of Fame)。

英國賽馬名人堂，自2021年為慶祝英國冠軍賽事系列十周年而設立，主要表揚自70年代至今，响英國賽馬發展有重大影響力嘅風雲人物。岳伯仁自成為古摩亞集團御用練馬師以來，一直係世界馬壇嘅主流人物，獲選固然當之無愧，而岳伯仁亦係第4位獲選進入英國賽馬名人堂嘅練馬師，對上三位分別係：Vincent O'Brien、施素爾爵士與及司徒德爵士。

現年54歲嘅岳伯仁，成名於祖家愛爾蘭馬壇，而自1996年為古摩亞集團效力以來，事業更上一層樓，曾經六度成為英國冠軍練馬師，至今勝出超過4000場頭馬，而由其訓練嘅「天文學家」，比佢更早响2022年已經入選英國賽馬名人堂，而呢匹一代名駒由昔日陣上豐功偉績，以至日後成為種王，响歐洲賽馬同育馬方面，一如岳伯仁都係影響甚遠。