打吡冠亞軍再出衰咗 季軍會有咩結果？

相信大家都認同今季香港打吡大賽非常精彩，三甲馬「大至尊」、「錶之銀河」同埋「嘉應傳承」鬥得非常燦爛，亦相信呢3隻馬前景秀麗。不過，始終跑了一場硬仗，真係可能傷咗少少元氣，最近打吡冠、亞軍「大至尊」同埋「錶之銀河」再出都係三甲不入，「大至尊」喺女皇盃未能應付變化地只得第8名，而「錶之銀河」喺冠軍一哩賽只得第5名。

到咗今個禮拜日沙田賽事，輪到打吡季軍「嘉應傳承」復出，角逐第8場2400米G3皇太后紀念盃，究竟能否比「大至尊」、「錶之銀河」有更好演出呢？其實後兩駒再出落敗，固然可能同打吣一役耗力多有關，但此兩駒一下子由跑4歲馬賽事變咗國際一級賽，對手大幅增強，未能交出水準都算合理。

反而「嘉應傳承」今場只係跑三級賽，況且上仗只係加咗佢5分，現評83分肯定有利，兼且今次喺皇太后紀念盃只係孭115超輕磅，休息時間又畀「大至尊」、「錶之銀河」多一個星期，應該可以交出好成績。