遨遊氣泡搵咗潘頓 咁浪漫勇士有決定未？

嚟緊下個月2號喺日本東京競馬場舉行嘅1600米G1安田紀念賽，有兩匹香港代表報名，其中姚本輝訓練嘅「遨遊氣泡」率先落實咗搵番潘頓幫手，夥拍此匹應屆董事盃冠軍遠征日本，咁另一匹報名馬「浪漫勇士」又點呢？

完成女皇盃3連霸後，「浪漫勇士」嘅目標鎖定為安田紀念賽，幕後當然想呢匹中距離王者可以繼季初揚威澳洲覺士盾後，再次喺海外贏大賽。不過，剛戰女皇盃的確耗力不少，沈集成亦強調要視乎馬匹復原情況，先至再作決定，並於尋日同馬主劉栢輝、騎師麥道朗開視像會議，睇吓是否如期遠征。

今朝我哋《東網》馬經記者就問過沈集成，成哥透露暫時仍未有最後定案，但初步嚟講對是否遠征日本，目前持審慎樂觀態度，並希望再觀察「浪漫勇士」多一星期，然後留待馬主劉栢輝再作決定。