繼續咁落雨 捧佢一定「必勝」！

近期天氣得一個字可以形容，就係「差」喇，好似今朝天文台就發出紅色暴雨警告信號，即使話啲雨勢集中喺西貢、將軍澳，但沙田都一樣幾大雨，場地點會唔受影響，而睇埋天氣預測，聽日都係應該有雨，咁似乎搵定啲游水馬就一定冇蝕底啦，其中一匹就係第10場二班田草1200米嘅「包裝必勝」。

呢匹5歲PPG過往試過3次跑好至黏地，成績係2冠1季，擺明係變化地專家，而輸嗰場只係以頸位之微不敵「金馳」、「魅力寶駒」，但可以跑贏「威力奔騰」，就知「包裝必勝」嘅淋地性能有幾好啦，同埋此駒今季演出長期穩定，季內9戰得兩場冇獎金，剛戰跑田草1200米二級賽都跑第5名，今次回師普通二班賽，預計有場地之助，況且練馬師呂健威目前仍全力追趕榜首嘅伍鵬志，各項條件齊備，值得重視。