班德禮：若然泥地有1400米 火神神樂就啱晒！

季內已取24W嘅黎昭昇成績唔錯，但練者最近表現沉寂，查黎廐對上一場頭馬，已經係3月20日「魔法速遞」。上期谷夜黎昭昇已派8駒出戰，結果「納百川」仍以頸位飲恨奪亞，未能為練者破悶局。

今期沙田日賽，黎昭昇繼續派9駒應戰，其中兩匹質新而且進度唔錯嘅「超力量」、「勇霸龍」已經畀潘頓Mark到實一實，另外列陣第3場四班1200米泥地嘅「火神神樂」，自轉跑泥地後已迅即交出走勢，上仗挾勇態出戰同程賽事，結果以鼻位落敗得亞軍，輸畀放頭放得順嘅「八心之威」。今次「火神神樂」唔忿氣再戰1200米泥地，當然係想收復前失。

班德禮接受訪問時表示，「火神神樂」至轉跑泥地後，最近表現係非常忠心準繩，每仗都交出驚人加速力，已經係敲緊勝門，若然有1400米田泥，相信佢都已經贏馬。騎者認為，「火神神樂」需時撻著，以泥地形勢，只要出閘後唔好唔好畀佢落後太多而且放鬆競跑，此駒撻得著就可以交出好好表現，今場預料有一定步速，希望可以造就「火神神樂」成功補中。