5點落嚟趁墟 今期「騅」佢嚟買實冇衰

近期方嘉柏密密有馬贏，即使昨日搏殺失手，未能打造3連勝，惟周三谷戰屯下重兵的他，當中不乏有近績支持之輩，絕對有力駁番條勝纜。然而，今早5點正，小方已在烽火台隧道口徘徊，煞有介事咁款，果然未幾即見旗下4匹參戰馬魚貫策至，分別係「飛騰騅」、「風雷暴」、「大千無雙」及「九秒九」，期間見練者先向4位鞍上人逐一畀操練柯打，繼而走到欄邊用手機替4駒的快跳操練打錶計時，鏡頭目不暇給。

需知本身着住白衫的小方已夠搶眼，課後見他特登老遠走到俗稱「木人巷」的回程通道，再恭迎上述4匹參戰馬，並逐一仄視操後神態，搏殺手影表露無遺，其中「飛騰騅」上場回配何澤堯即視對手如無物，輕勝兩個半馬位而回，首度征服一哩賽事，似乎依家先開竅，今勻轉爭谷中一哩，仍只係面對一眾五班對手，可望再斬幾両！