堅韌力右前足受傷 放棄遠征凱旋門大計

Carrot Club昨日宣布，上月底於春季天皇賞大敗嘅4歲新星「堅韌力」，由於右前足趾骨骨折休養，決定放棄報名今年遠征法國凱旋門大賽。

「堅韌力」去季以3歲出道跑過6仗，除首戰跑第3外，接住取得5連勝佳績，最佳表現當然係响G1菊花賞，擊敗同主去年日本打吡大賽得主「琴鍵高奏」，練馬師尾關知人坦言對於呢匹馬房新星，响今季部署自然躊躇滿志。

然而今季首仗於金鯱賞復出，不敵「先見」跑第2，以為熱身後上場於春季天皇賞可以恢復水準，在戶崎圭太胯下，快跟至末段無以為繼，慘敗以第15名過終點，最終更係屋漏兼逢夜雨，右前足趾骨更被驗出骨折，練者透露暫時首要讓馬匹休養，且看進展如何，再作安排。

另一邊廂，杜拜草地大賽第五名嘅「勝局在望」，就會報名出戰，期望响2022年後，第二度出戰凱旋門，不過當前目標，就係6月23日所舉行嘅寶塚紀念賽。