落到五班即用布文 頭場即捧悠悠我心

賀賢同布文呢對澳洲騎練組合今季頻有佳作，最近更憑「賢者無敵」攜手贏咗一級賽主席短途獎，非常威水。不過，除咗贏大賽，賀賢亦好喜歡搵布文喺五班賽出擊，尤其安排佢騎啲啱啱落班嘅馬。睇番數據，佢哋今季試過13次喺五班賽攜手合作，成績係5冠3亞1季，勝出率達38.5%，而頭馬包括「飛來勁」、「家樂飛駒」、「怡昌勇士」、「日就月將」同埋「北海盜」。

嚟到今個禮拜六沙田賽事，頭場五班田草1400米，賀賢就將剛落到五班嘅4歲PPG「悠悠我心」強配布文出擊，即使此駒近績平平，似乎都係要吼實。其實此駒上季出道跑咗3場，攞到1殿2第6名，演出唔太差，今季初出跑1000米直路賽都追上嚟第5名，輸唔夠兩個馬位，點知之後愈跑愈差，最近3場都係跑第10名。

不過，自從1月初輸咗場1400米後，賀賢讓「悠悠我心」抖咗4個幾月先上陣，埋門於從化試咗兩次大閘，其中一課更由布文親自考驗，因此今次落班強配係早有部署，仲要抽3檔好位，不能忽視。