錢我大把！我要真愛呀~

近期《東張西望》訪問嘅何伯，堅係最hit topic，何伯飲飲吓湯聚咗個細卅年嘅嬌妻返來，又買勞又買戒指又盛，諗住臨老搵到至愛安享晚年喇...點知搞咗場大龍鳳，同仔女炒晒大鑊，新老婆出鏡後又潛埋水，錢又冇晒得番幾千蚊責袋，真係唔知收科喇...

不過好多嘢都係睇人，好似我哋馬場型佬十三少韋達咁，近排咪又搵咗個新女朋友，但佢做到八面玲瓏噃...依家經常孖公仔現身，都唔知幾咁煙韌，至於話仔女鐘唔鐘意？唔知喇，但見過佢哋同場同框，即係當無事囉...韋達出晒名醒目世界仔，之前季中成績平平，可能就係要拆掂啲嘢啫，依家搞妥晒冇後顧之憂，頭馬不停贏呀，剛剛又孖住女友連拉兩場頭馬，呢個真係最佳人設。

到今次周末，韋達又有唔少馬有餐士，頭場匹「喜愛善」上次追第2餘勢好勁，今次已經有權補中，第3場初出馬「會長之寶」，自購馬近兩戰分別贏表列賽同三級賽，來港後一直力磨，早前試閘更跑第1，走勢已經好熟；第7場「九五赤兔」上鋪贏完上1800都照跑第3，今次縮跑贏馬一哩，分分鐘執今季第2W呀。