審慎觀察後 浪漫勇士落實成行安田紀念賽！

「浪漫勇士」服役至今已7勝一級賽，今年此駒5度出戰國際一級賽，當中近4戰全勝，上場雖然喺黏地出戰2000米G1女皇盃，沿途形勢十分惡劣，但「浪漫勇士」仍憑鬥心贏馬，第3度攻下女皇盃。賽後沈集成亦表示要視乎馬匹狀態先決定去唔去跑6月2日喺東京競馬場舉行嘅1600米一級賽安田紀念賽。

「浪漫勇士」昨日(9日)由布文過檔同「十八掌」喺草地拍跳，沈集成今日(10日)表示「浪漫勇士」跳得唔錯，經過幕後一輪商討後，「浪漫勇士」已落實成行安田紀念賽。早前「遨遊氣泡」已決定遠征日本，並由潘頓執韁。