韋達有寶 梗係益同鄉希威森！

今期沙田日賽，戲碼雖未算豐富，但勝在夠多新馬出籠，唔少馬房喺季尾，都將一堆新馬都安排上陣吸取經驗。其中第3場三班1000米田草，10駒上陣嘅場合就有4匹初出馬。另外「英勇快車」都只係上陣過一次，所以話都係亂局之一。

呢場賽事之中，韋達馬房「會長之寶」當然有唔少人留意，事關呢匹馬落地操練後只試兩課閘，但3月15日谷閘就喺谷中展現飛快前速，最後更一放而回勝出。「會長之寶」兩課閘都由希威森一手包辦，而騎者都表示呢匹馬有潛質，而且海外賽績好好，不過今場初出，以呢匹馬體形唔算大隻要負重磅上陣當然有難度，但本身在港評78分起步，證明隻馬有一定質素，雖然有眾多難度要克服，但長遠而言會係一匹有競爭力嘅賽駒，初出都希望佢可以跑得好成績。

希威森又透露，本身「會長之寶」會喺5月7日再試閘，但該日沙田草閘取消，所以就直接跑今場賽事，相信此駒都已準備就緒，寄望佢到時可藉天生前速展現能力。