【變出彩虹】潘頓連場死火係咎由自取？定事出有因？

潘頓剛賽日又食白果，今季佢單日交白卷次數多得人驚，現時5月中先剛好過100W，早幾季基本上晨早就破百了，不過有時跑馬跑馬，確係以馬為先，潘頓現時可說是半退休心態，明顯主力在大賽了，在平日賽事揀既坐騎，可以差到嚇人，好似剛周末，「萬眾開心」跑沙田直路賽都騎？「龍城金將」更是無績的大冷門，「喜蓮勇感」、「金匯昇昇」亦非牌面馬，再數對上一次同樣0W的谷草，手執的「爭金奪冠」、「威武寶寶」、「日頌月讚」等等，賽前睇都不算強。潘頓冇積極搶好馬之餘，「供應商」成績唔突出也是主因，同潘頓有交收的名牌前列倉如蔡約翰、羅富全今季大跌watt，榜首伍鵬志近期都明顯慢下步伐，另外容天鵬、黎昭昇亦平平無奇，反觀季尾大攻勢的威哥有何澤堯等騎師幫手，勢勁的告東尼又有徙弟鍾易禮，輝哥亦較少用佢，潘頓勁到識飛都冇用了。●靈駿