【戰況R8】馬主：砂漿金剛轉倉後食得又操得

「砂漿金剛」上季喺丁冠豪馬房取得2W，但今季5戰全敗，繼而轉投告東尼，今仗轉廄後初出配上鍾易禮，雖然排11檔，但依然被捧成3.8倍大熱門，結果喺沿途走外疊之下依然大勝而回。今場跑第2名為巴度「椒椒醒」，田泰安「背背龍」跑第3，第4名為蔡明紹「宏才」。

賽後，馬主陳緯邦表示「砂漿金剛」以往比較搶口，但埋門試閘隻馬展現加速能力，不過今場抽11檔起步，信心一般。「砂漿金剛」轉倉後，留意到隻馬體重穩定咗，本身唔算食得足，但轉倉後保持到食量，而且操練亦都頻密咗，今日毛色好靚，而且走落冇以前咁重口，相信除咗交叉鼻箍都有幫助。

問到點解會選擇轉投東廐，陳緯邦表示身邊有啲馬主、馬販朋友，都話告東尼教重口馬好，所以託人介紹，告東尼睇完都肯收，今仗轉倉初出贏咁遠有啲驚喜，希望評磅員加分唔好咁重手。至於鍾易禮操開「砂漿金剛」，同騎練溝通都好好，希望繼續交出水準。

第8場賽果：4-9-8-10

二重彩賽果：4-9(最後賠率20)