點止浪漫勇士 遨遊氣泡試閘勁到爆！

為方便練馬師備戰將於今個月26嘅舉行嘅新馬賽，今朝馬會安排兩組草地試閘(800米及1000米)，而國際一級賽的報名馬匹也可參加上述試閘以方便其備戰。難怪姚本輝今朝安排報咗下個月2號日本安田紀念賽嘅「遨遊氣泡」試第1組1000米草閘，為呢場1600米一級賽備戰，兼且搵埋鞍上人潘頓親自考驗。

話晒係遠征日本前最重要操練，梗係要一絲不苟，潘頓亦認真考驗「遨遊氣泡」，始終同組出試嘅馬同呢匹一哩好手評分有一段距離，結果此駒輕鬆以首名過終點，走勢譽滿欄邊。連同遠征杜拜，「遨遊氣泡」今季上陣6次，只得杜拜草地大賽一役甩三甲，其餘5仗獲1冠2亞2季，而此駒過往3度由潘頓策騎亦得1冠2亞，最近一次正正於2000米G1香港金盃只不敵「浪漫勇士」。所以今次遠征安田紀念賽，香港隊點止得「浪漫勇士」，「遨遊氣泡」亦不能忽視。