試閘冇甩碌 周嘉儀讚天下寵兒有進步

前美女新聞主播周嘉儀自從榮升馬主後，一直都好緊張愛駒「天下寵兒」，間唔中更會落嚟沙田馬場睇吓愛駒試閘，話晒首次做馬主，梗係肉緊啲，上個月初呂健威安排呢匹3歲馬試閘，由愛將何澤堯考驗，周嘉儀更專程到場嚟睇，可惜馬兒出往起步點前將何澤堯拋跌，令周嘉儀敗興而返。

去到上個月16號，「天下寵兒」改由希威森試泥閘，今次就無發脾氣，但最終試閘跑包尾。到咗今朝「天下寵兒」試1200米泥閘，繼續由森仔考驗，而周嘉儀更一早到場，並於機坪接馬兼且拍吓愛駒馬頭以示鼓勵，而此駒今朝試閘走勢有明顯改善，周嘉儀臨走時亦透露愛駒的確比前更淡定，鞍上人希威森都話有進步，但始終得3歲仲係好後生，仍需要多啲訓練。