飲完法國靚酒 巴度話想食潮州粥

昨晚巴度憑閘前票如雨下的「鑽石寶寶」贏馬兼捧走出自法國的蘇特恩盃，仲有支靚酒攞走，兼且連贏兩期，人逢喜事精神爽，難怪今早捱眼瞓追更開工都一樣咁好笑容，而他到場的首匹出試馬正是出戰周日沙田賽事第場的「潮州精神」，並在大圈快跳800米，顯然心中有馬。

到了耙地空檔，這位法國好手更第一時間跑去烽火台，搵文家良匯報「潮州精神」，意志十分堅定，兩人你一言我一語，傾到難捨難離，而騎者最後以一記微笑結束會議，可見對今戰補中機會十分樂觀。需知「潮州精神」上場孭足135磅，三疊轉彎下剷入大冷Q，姿態令人側目，今勻原庄配搭續爭田草1400米，同時一樣跑C+3，並與上場頭馬「仁心星」狹路相逢，不過「潮州精神」今戰讓少對手6磅，只要轉彎搵到遮擋慳番腳程，絕對有力反先！