蔡神仙會唔會前5名都冇？

上季以79W第12度封王嘅蔡約翰，都預咗今季應該要回氣，成績未必太突出，但點估到佢依家隨時連前5名都守唔住，就真係有啲意想不到喇。蔡約翰暫時有45W，正正排喺第5位，但其實頭馬數字同告東尼、沈集成一樣，而近況唔錯嘅希斯同埋谷中王方嘉柏都有44場，換言之蔡約翰呢位第5名，唔算太穩陣，如果有咩閃失，隨時跌落第8位都唔奇。

睇番近呢10年蔡約翰嘅成績，大部分時間都係非冠即亞，只於2019至20年馬季只得46W得排第6位，而佢今季已有45場，成績唔會差過嗰季啩，只係最終排第幾，真係未知之數。同埋睇番今季的確比較少可以扶搖直上嘅蔡廐PPG出現，當中最好表現嘅應該係「氣勢」，5戰取得4冠1亞，可惜自從1月22號其右膝接受關節鏡手術後，一直缺陣至今，近期已恢復快跳，睇吓會唔會季尾復出啦。