尾場強手如雲？抽到1檔當然要自力更生

喺香港要站得住陣腳向來都唔易，要有穩定支持先可以有發揮，今季暫時只取2場頭馬嘅巫顯東，雖然頭馬數字唔多，但上仗頭馬贏「大紅袍」一放而回，留放出色，而賽後練馬師羅富全都認為巫顯東冇咩跑錯，所以都畀多次機會佢，結果造就騎者取得寶貴頭馬。

東東今季支持唔算多，主要都係來自徐呂、鄭廐等。今期沙田日賽，東東就有4匹坐騎，雖然坐騎質素未見突出，但第10場三班1400米田草隻「自力更生」就值得留意。此駒今季中轉投鄭俊偉馬房後，喺田草或谷草中距離路程不時跑近，上仗出戰二班1200米，雖然田草路程嫌短，但末段締速為全組最好一駒。今仗「自力更生」降回三班並增程出戰1400米田草，抽得1檔好位，早段可以跟番個機動位置跑順步韻，居此班仍有力施冷箭。