【晨課起筷馬】初次試閘已掩不任鋒芒

第4場四班1000米，是場多駒屬路程專家，加上有近績支持，必定惹來關注，廖康銘馬房「祝願」初次上陣嘅自購新馬，預計會有分頭，值得一敲。「祝願」到港後1月份開操，但馬匹進度相當普通，因此馬房喺操練上相當用力，快跳工夫都以拍跳對待，務求盡快將狀態推高。直至3月中，操練部署稍稍放緩，快跳改以單跳為主，明顯係狀態已納入正軌，不用再作力磨，喺呢段期間亦卜定霍宏聲打理。

既然狀態有起色，馬房亦安排「祝願」試閘作考驗，首課閘是偏短路程嘅田草800米，馬匹起步反應敏捷，毋須催策下已自動增速領放，姿態從容利落，拍實「舉步生風」彈開主馬群過終點，締速46秒1，甚具水準。

若睇試閘，「祝願」近兩課谷草1000米及田泥1050米閘，名次分別係第3及第4名，跑番長啲即時現形？其實一課因排外檔收慢切入，另一課則起步前跪造成嘅錯覺而已，與能力並無關係，論態早已到位。

■陳志懷