賀賢新勝馬今朝走甩 丁冠豪有份幫手捉

跑完大賽已經今朝晨課都平靜啲，但都發生一宗小意外，事緣賀賢原定安排一對廐侶「嘉應獎昇」同「還看今朝」喺草地1800米拍跳彈閘，點知「嘉應獎昇」出閘前將鞍上人拋低，開閘後一直向前跑，「還看今朝」就由布文繼續考驗，而「嘉應獎昇」最後更吉馬跑過終點，擾攘咗大約3分鐘，先由馬房第二副練戴兆鄰喺馬房彎捉返。

「嘉應獎昇」走甩後一直全速向前衝，走咗大半個圈，期間馬場職員連同多名練馬師幫手捉馬，包括丁冠豪、告東尼、大衛希斯都有幫手，但此駒見到有人就調轉頭繼續衝，慶幸有驚無險，最終由賀廐第二副練戴兆麟喺馬房彎捉番，而據了解被拋低嘅騎者無大礙。

「嘉應獎昇」最近於三班田草1000米建功，復課後操練仍積極，今次安排拍跳彈閘，極可能為下個月8號的三班1000米直路賽做準備，唔知今次走甩會否影響部署。