頭場5駒參戰3隻放頭 賽果隨時估唔到！

究竟馬少場合係咪真係咁容易中？事實話你大家知唔係，好多時喺出馬唔多嘅賽事，往往都跑出驚人賽果，絕對估佢唔到。而喺今個禮拜三嘅沙田全泥夜宴，頭場二班泥地1650米只得5駒參戰，表面上似乎好簡單，但其實有不少暗湧。

一場賽事由步速主宰一切，有時見到啲場合無馬放，都真係幾頭痛。但呢場二班泥地1650米就啱啱相反，5隻參戰馬中，「電訊巴打」、「保羅承傳」同埋「黃腳鱲」都係靠放頭食胡，究竟最終由邊隻放頭，已經唔易估，同埋究竟呢3隻馬會唔會鬥燒？因為過往佢哋都唔太識追馬，咁3隻早段大鬥法，隨時益咗後上馬都唔奇。

如果真係出現呢個情況，咁蔡約翰隻「魅力寶駒」都唔好睇小，首先呢隻馬季內贏咗兩場泥地1200米，場地性能一定好，即使初跑泥地一哩，但最近幾場都見到呢隻馬落腳慢姍姍來遲，增程正正係合理部署，撞正快馬多場合，千祈唔好睇小。