【露露通】飛馬將軍贏番場

上周五馬會宣布修訂練馬師續牌標準，除咗冇咗五班只計兩W嘅嚴苛規例之外，合格頭馬數字亦減少，變相已贏15場嘅鄭俊偉即時上岸。由五班只計2W以來，所引發嘅一連串問題眾多，除咗有幾位練馬師請辭之外，部分成績穩定嘅中游馬房成績突然大幅下滑，話雖馬圈有情，但實際上馬主養馬都係錢，冇馬贏萌生轉倉意念都不為過，練馬師因一時運氣唔好或其他環境因素而陷入惡性循環，要翻身都唔係口講咁易。

現時只差4W畢業嘅丁冠豪，最近質新馬正上軌道，季內餘下日子要贏4場都唔係冇可能，今期丁廐雖只派兩駒上陣，但第3場四班1800米「飛馬將軍」上仗留得太後冇得追，今次排檔改善寄望可跟番前少少，形勢配合下，四班有望贏番場。