【大跑道】武千帥省完更專注

周二朝有兩匹參戰馬到大圈出試，同樣由助手踱一圈，「龍船快」擔高頭走，神采飛揚，馬身好壯，毛色立立令；「超額認購」步伐穩健，力度唔錯，抖夠操足，觀感不俗。以下是心水推介：

第5場「亞機拉」唔再一味要放，稍留跟前守好位更勁，今戰快馬多，有望快入二疊甚至埋欄，論馬仍然不斷進步，上仗力戰僅不敵「禪勝輝煌 」，後駒再出跑三級賽奪亞。「亞機拉」最近試閘沿途走外疊一樣輕勝，氣勢如虹。

第6場「囍眼光」首戰檔差走外疊，仲要大半程搶口敗不作準，有了一次比賽經驗，復課上從化備戰，於當地試大閘不單止一放而返，甚至韁口也轉好不少，再看剛周一試跑唔急好規矩，確認踏上正軌。

第8場「武千帥」上仗復出狀態頂多八成，仲要賽前出跳偏急躁火旺盛，仍能躋身三甲，表現相當犀利。跑完一仗洩去虛火，近期操練專注得多，剛周一帶住馬定基試跑神閒氣定。