【雅士谷最強】莫雅今晚追過戴圖理？！

今個禮拜嘅英國皇家雅士谷賽期，相信大家都會諗起殿堂級好手戴圖理，事關佢向來都被喻為「雅士谷之子」，亦係此個賽期最成功騎師之一，可惜即使佢最終延遲佢嘅掛靴計劃，轉往美國發展，但就真係無再喺英國策騎，今屆皇家雅士谷賽期亦只係返咗英國做嘉賓。

睇番啲資料，皇家雅士谷賽期歷來頭馬最多嘅騎師就係英國國寶柏葛，合共累積116場頭馬，而戴圖理就以81W排第2位，但佢嘅二哥地位，應該會畀莫雅追過喇，事關後者今屆賽前已累積79場皇家雅士谷賽期頭馬，即使佢喺首日食白果，但尋晚憑「大草原州」、「多產巨匠」起孖兼捧走G1威爾斯親王錦標，令佢累積頭馬數目增至81場，成功追平戴圖理，嚟緊仲有3日賽期，相信佢可以取代戴圖理成為二哥。

其中今日Day 3賽事，莫雅喺焦點賽事雅士谷金盃夥拍熱門「饒舌達人」，同日第2場木英皇佐治五世錦標嘅「貴冑城堡」、漢普頓宮錦標嘅「波特蘭」都有近績支持，隨時又可以連場數胡。