【場地點樣】夜賽倒數 今晚跑C欄掛牌好地

6月最後一次賽期，跑馬地夜賽尚餘3期，今晚踏入倒數階段，9場草地賽事，以移欄C跑道進行角逐，頭場開跑時間為晚上6時40分。

今晨勘察場地之後，掛牌「好地」，度地儀指數為2.72。連日天氣炎熱，雖然天文台預測會有局部地區驟雨，期望今晚仍可在正常場地角逐，以下半季令人失望嘅場地狀況，亦不能期望會有太乾快場地出現，維持好地情況已算理想。

綜合今季谷草C欄共舉行9次賽事，其中包括唯一谷草日賽，合共79場次，騎師成績，潘頓絕對係C欄專家，今季頭馬數字14W，比起以7W排响次席嘅田泰安，已經多咗一半，不過田泰安今季响C欄係Q腳王，取得17次亞軍冠絕同儕，呢兩位騎師當然要秤先。

仲有一位值得留意嘅黃智弘，雖然係C欄出賽次數最少騎師，但亦有6W响手，而上次由佢爆冷嘅「天足貓」，今季响C欄亦由潘明輝贏過，如今再由黃智弘出戰，加埋其餘邊線坐騎，7磅仔依然可以視為投注指標。