維省馬會高層：仲有機會見浪漫勇士衛冕覺士盾！

幾乎可以話穩奪今季馬王寶座嘅「浪漫勇士」，究竟今年下半年嘅部署係點，相信好多人都好關注。話晒「浪漫勇士」今季先後試過揚威澳洲嘅覺士盾，同埋日本嘅安田紀念賽，相信呢兩個地方嘅馬迷都好想呢匹中距離好手再次遠征。

其中澳洲維省賽馬會一直好想「浪漫勇士」再次嚟澳洲力爭衛冕覺士盾，但據初步了解，沈集成同馬主劉栢輝傾向讓「浪漫勇士」下半年留港作戰，並以年底嘅香港盃為目標。早前維省馬會專責遠征馬匹事務嘅Paul Bloodworth嚟咗香港，亦搵沈集成傾過，佢話暫時未收到正式嘅拒絕，所以相信仲有機會見到「浪漫勇士」再嚟澳洲。

Paul Bloodworth話初步了解沈集成應該唔會安排「浪漫勇士」出戰於10月尾在日本舉行嘅2000米一級賽秋季天皇賞，但未有正式拒絕去澳洲嘅邀請，所以覺得一切未絕望，當然佢都覺得「浪漫勇士」下半季遠征機會不大，但仍會盡力嘗試。