連食4日白果又罰6萬　OK哥夫卜反擊！

禮拜四嘅跑馬地賽事，潘頓就要停賽1日，而田泰安、布文同埋尋日連中三元嘅希威森都係夫卜出擊，其中OK哥最近手風真係唔算太順，對上一次贏馬已經係上個月12號嘅「赤兔猴王」，換言之即係近4次賽事都食白果，尋日佢仲因為策騎「博愛先鋒」犯規，即使唔使停賽但要罰6萬蚊，都未話唔肉赤。

呢輪布文真係算唔順，固然無頭馬，但成日跑2至4名，尋日又多添兩個亞軍，今期冇咗潘頓，自己又騎足9場，應該都好想打破悶局，盡力爭取好成績。睇番佢今次啲坐騎，除咗自己對上一匹頭馬「赤兔猴王」，第3場四班谷草1000米嘅「鴻圖新星」，剛戰喺田草1000米直路賽後上跑第2名，今次轉跑谷草1000米，埋門再試泥閘打磨，不能忽視。

至於尾場「雪勇神駒」落到三班肯定有戰鬥力，上仗人馬合作亦得季軍，而「耀寶駒」縮程跑番谷草1200米，亦要吼實。