上仗久休復出開勝門　尋寶勇士增程得唔得？

方嘉柏馬房嘅「尋寶勇士」上季尾因為左前腿不良於行退出賽事後，去年8月右前腿肌腱亦受傷。最終休息接近一年之後，先喺今年5月復出，結果喺何澤堯胯下勝出谷草四班1000米，而此駒周四將增程出戰第7場四班谷草1200米，究竟能否再下一城呢？

其實呢類曾經有傷患嘅馬，抖咗咁耐都能保留，只要復出攞到成績，往往可以持續反彈，而「尋寶勇士」馬主梁頴宇爸爸梁孔德上仗賽後好感激方嘉柏畀心機去處理愛駒傷患，即使自己都唔知健康有咩問題，但既然幾乎整年無上陣，情況都幾嚴重，好彩方嘉柏能夠幫愛駒復原。

梁生亦覺得「尋寶勇士」本身有能力，喺四班絕對無問題，同埋血統可以再跑長少少，上場只係靠質素贏嫌短嘅谷草1000米，照咁計，今次增程跑1200米應該更合腳法，真係唔怕追寶尾啦。