浪漫勇士今年唔遠征　部署年底香港盃

今季5勝一級賽嘅「浪漫勇士」早前獲澳洲同美國方面邀請，希望呢匹準香港馬王可以遠征覺士盾同育馬者盃，但練馬師沈集成同馬主劉栢輝分別受訪時表示今年「浪漫勇士」再出外遠征機會很微，現時會將目標直指年底香港國際賽事2000米一級賽香港盃。

劉栢輝指遠征澳洲要照3次電腦斷層掃描，為咗愛駒「浪漫勇士」健康著想，再去澳洲嘅機會唔大，而如果去美國跑11月嘅育馬者盃，由於路途遙遠，就有機會趕唔切返嚟跑香港盃。沈集成亦傾向留喺香港，先以11月2000米二級賽馬會盃作熱身，再跑香港盃、香港金盃同女皇盃。

劉生希望「浪漫勇士」可以喺下季超越「金鎗六十」，成為全球最高獎金嘅賽駒，並指今年好大機會唔會再遠征，但講到明年的話，就唔排除遠征杜拜出戰1800米一級賽杜拜草地大賽或2000米泥地一級賽杜拜世界盃。