明日3組泥地大閘　神仙2匹煞科賽子彈要存記

跑完周四跑周六，不過夾主明日星期五晨課檔期，仲會有慣常周五大閘，共編3組，雖然季尾試閘，畀啲未出賽嘅新馬仄試成數居多，不過睇落呢三組閘嘅名單，又有個別馬匹名單，旗幟鮮明為煞科賽做定最後準備。

蔡約翰响明朝試閘，就會安排兩匹馬試閘，布文再試剛戰上名「神馳」唔奇怪，但剛戰由巴度露光殺入冷腳嘅「小飛俠」，竟然係由潘頓接手响第一組仄試，神仙搵得佢，當然唔係試定留番下季，响煞科日就有四班1800米賽程，估計將會鎖定力謀補中，而剛戰後上入位嘅「神馳」，應該會响煞科賽嘅1200米或1400米二揀一。

潘頓明日到場試閘坐騎之中，除咗頭場「小飛俠」之外，另一匹第三組仄試馬匹同樣矚目，就係為衝冠倉主伍鵬志仄試「盈妍威楓」，一連兩仗都由田泰安出戰，今仗由二哥換上一哥，响呢個衝冠關鍵階段，搵到潘頓做最後仄試，睇嚟都會成為馬房煞科賽嘅衝冠籌碼。