隔幾日再出　錢途光明準備跑第一？

目前只得12場頭馬嘅丁冠豪，尋日沙田黃昏賽傾巢而出，派咗多匹實力馬參戰，可惜最功無功而還，幾匹熱門「同得威」、「魯班精神」同埋「錶之將來」全部三甲不入，反而冷至36倍嘅「錢途光明」卻喺五班泥地1200米後上跑第2名，畀季中喺自己馬房轉走嘅「快馬加鞭」擊敗，都咪話唔慘情，結果仲係爭2W先上岸。

嚟緊周三跑馬地煞科戰，丁冠豪原來安排咗「錢途光明」匆匆再出，此駒喺五班谷草1000米嗰組列正選，究竟能否順利補中呢？其實呢匹只得18分嘅馬，處於淘汰邊緣，如果未能取得頭馬，就會被硬性退役，但此駒最近愈跑愈好，前仗喺谷草1000米跑第3名，尋日就取得亞軍，名次拾級而上，今次繼續由潘明輝輕磅出擊，跑番谷草最短途，睇吓能否順利補中啦。