僥倖兩連勝　仲嫌招牌未夠令？

正當大家聚焦呂健威與伍鵬志競逐冠軍練馬師寶座，但其實有位前冠軍不甘示弱，正是近6期贏足5期的姚本輝，即使上期斷咗纜，惟今期跑馬地煞科戰，旗下參戰馬不乏當打份子，當中「魅影獵飛」及「非惟僥倖」可謂新勝猶勇，俱贏到對手冇得跑，今舖擺明車馬要添食，同時駁番條勝纜最緊要。

然而，今早開操冇耐，烽火台地下兩部電腦畀兩個人霸住，一個係計數爭冠的威哥，另一位就是輝哥，戰意堪稱加零一，未幾姚廐首匹出跳馬「非惟僥倖」即由助手起步，練者立即返回食胡位舉鏡睇操，課後連隨走落隧道底接馬，再護送人馬返機坪，緊張之情表露無遺，此駒一連兩仗都係中段開始發力上前奠定勝果，相信今戰也會採取相同策略，盡情省招牌，而輝哥一大清早霸住部電腦，唔通就是要盤算同場有何對手會作出暗算？