【耀眼精選】皆益善熱身後砌

2024年07月10日 00:00
東網電視
更多新聞短片
凡涉及金錢嘅地方,就會吸引詐騙集團設計布局等肥羊自動送埋口。近期馬圈最新鮮滾熱辣嘅熱話,就係一個以高回報作招徠嘅馬匹育成計劃終於爆煲。
筆者響2021年機緣巧合下,響一個朋友團聚會認識到一位對賽馬有濃厚興趣嘅太太,透過佢筆者第一次聽到呢間A字頭嘅公司,一聽佢初步講解就覺得伏味濃,所以即時同阿太交換電話,等聚會完咗再同佢詳談,希望可以說服佢打消投資念頭。可惜嘅係始終遲咗一步,第二日對談阿太話一早已經畀咗錢參加幾個計劃,夾夾埋埋投資過百萬,筆者嗰一刻即時O嘴,估唔到一個外表斯斯文文嘅「師奶仔」咁鍾意馬,出手咁狠,同時概嘆點解咁遲先識到佢呢!
更爆嘅係,筆者同馬友傾開呢單馬圈熱話,馬友發揮驚人起底能力,掘到A字頭公司嘅李姓股東兼董事,竟然同一位被慈善基金幫助過嘅受助人同名同姓,嗰位受助人耳仔輪廓同埋唏噓嘅鬚根,同A公司嘅李姓董事八九成似,只係後者大咗半個碼。如果真係同一人嘅話,只可以講就算《捉智雙雄》嘅編劇,都寫唔出呢個劇本。
谷草煞科戰戲碼同樣相當精彩,推介第7場沈廐「皆益善」,上仗初出跑1000米實在太短,大敗只屬假象,熱身後加程至1200米,可望提升名次。