杜滿樂休戰一個月復出 周末巴黎大賽再接筍盤

2024年07月10日 11:40
東網電視
更多新聞短片
杜滿樂拇指傷愈昨日已經復出,本周末將會出戰巴黎大賽。
剛剛轉播法國莊柏德大賽日,可能大家會好奇唔見咗大賽騎師杜滿樂嘅蹤影,原因係佢上月8日響里昂帕里馬場(Lyon Parilly)舉行嘅一場賽事,因為受到連環墮馬影響,落樓時整傷拇指,手指輕微骨折,結果令佢養傷成個月,期間錯失唔少重要G1賽期。
昨日響法國高濱馬場,杜滿樂正式傷愈復出,只係跑咗兩場志在熱吓身,緊接而來星期四、星期五,佢分別會響特夫方丹同高濱馬場上陣,不過佢最期待,當然係呢個周末,返回隆尚出戰頂級水平賽事,其中重頭戱由3歲精英出戰2400米嘅巴黎大賽,佢就重接筍盤,為出道至今3戰不敗古摩亞旗下Delius出戰。
對於呢匹由名牌練馬師盧傑訓練嘅Delius,出道首2仗已由杜滿樂包辦頭馬,而上個月受傷期間,就搵咗蘇銘倫做替工,成功挑戰G3水平,摘下2400米嘅連斯錦標,今次再向難度挑戰初跑一級賽,古摩亞亦都自視極過,早已揚言以凱旋門賽為終極目標,杜滿樂復出即刻重掌帥印,對於呢場大戰定必嚴陣以待。