英國最紅新星 七月盃初登G1舞台

2024年07月10日 13:15
東網電視
更多新聞短片
英國新星劉見龍夥拍「樂於助人」出戰七月盃,衝擊首項G1榮耀。
英國騎師人才輩出,呢期人氣最勁嘅,梗係3月剛滿18歲嘅劉見龍(Billy Loughnane),年紀輕輕上季已經成為英國冠軍見習騎師,而剛響皇家雅士谷賽期,就以「剛強風」摘下G2高雲地利錦標,其後更響出馬多達30匹嘅沙特利咸錦標,夥拍「女高音」以半身位擊敗金美琪同紀仁安兩位高手坐騎,大場面一啲都唔失禮。
呢個星期六,劉見龍將會衝擊一級賽,獲得大馬主Fitri Hay邀請,夥拍「樂於助人」(Khaadem)出戰新市場舉行嘅七月盃。而呢匹馬新鮮熱辣,連續兩屆皇家雅士谷賽期贏G1,今年就由莫艾誠再次成功衞冕女皇伊利沙伯二世誌慶錦標,不過嫡系騎師史賓沙正處停賽,而莫艾誠今個周末就卜咗響雅士谷上陣,練馬師候耀誠同馬主商議後,決定搵呢位當經新星接手。
雖然劉見龍年紀輕輕呢兩季贏咗唔少榮耀,但響英國要躋身一級賽騎師行列,並唔容易,更何況今次係接手一匹實力坐騎,雖然新近贏完G1,畢竟「樂於助人」已經8歲高齡,面對一眾質新短途精銳,如成為今場大熱門嘅應屆英聯邦盃得主「構想所在」,又或者係上季成為最佳2歲新星嘅「宏達驥」,當地莊家又唔係太看好再打硬仗嘅「樂於助人」,暫時獨贏賠率只定為15倍冷門。
以馬論馬,「樂於助人」貴為新鮮G1得主,劉見龍為衝擊首項G1榮耀,鬥志更加唔使懷疑,睇吓呢位英國新星,可唔可以響佢首場G1即刻一鳴驚人。