唔係比特幣 伍鵬志秘密武器比特星?

2024年07月11日 10:28
東網電視
更多新聞短片
「比特星」(前)埋門試泥閘做快時間贏馬。
練馬師爭冠去到最後100米,尋晚跑馬地煞科戰,呂健威全力出擊,可惜只能多添兩個亞軍,仍落後伍鵬志1場頭馬,唯一可喜嘅係依家呂廐亞軍只爭伍鵬志1場,因此如果禮拜日威哥攞到1冠幾亞,仍有機會以較多亞軍數目反先封王。而睇埋禮拜日陣容,呂廐的確傾巢而出,究竟伍鵬志有冇計還擊呢?
其實伍廐禮拜日都出9駒,當中「初戀」及「堅闖」都係強配潘頓,但角逐第9場三班田草1200米嘅初出馬「比特星」,可能先喺Pierre爭冠嘅秘密武器。呢匹3歲澳洲自購馬來港前4戰1冠2亞1殿,演出算準,當然唔算太突出,唔係都唔會評65分插班。
不過,「比特星」來港後工夫都算多,先後試咗6課大閘,走勢亦愈來愈好,尤其係上個月尾試田泥1200米閘,沿途跟前,只係落後「同祥和順」及「安康萬里」,後兩駒最近相繼贏馬,證明係高水準試閘。然後伍鵬志覺得未夠喉,今個月初再試多課泥地1200米閘,結果一放到底,造1分10分35快時間,擺明操足而臨,睇吓能否一鳴驚人啦。