韋達搵抖暑費 特別關照呢位兄弟

2024年07月11日 11:46
東網電視
更多新聞短片
韋達仲未肯抖暑,今朝仍戎裝課馬,必有所圖。
今早為周日馬季煞科戰參戰馬的主要快跳課期,差不多全體騎師都甘願捱夜追更,並親替自己的坐騎考驗,以加強人馬溝通,場面異常熱鬧,睇嚟個個都想標個尾會,搵番多少抖暑費。至於貴為13屆香港冠軍騎師的韋達,騎而優則練,今早依舊戎裝策馬出試,不過他只係獨操一駒,正是出戰第11場的「富國兄弟」,擺明高度重視。
6時左右,韋達一馬當先,策「富國兄弟」出大圈試跑,同為今期的正選廐侶「祥勝霸駒」、「超霸勝」及「連捷」亦魚貫步往大圈試跑,後駒由見習學員黃寶妮出試,4駒全部在中檔較少馬踩過的「靚地」快跳,似乎係悉心安排,而「富國兄弟」上場初跑草地1400米,頭兩段跟快咗,難怪末段無以為繼,但畢竟此駒在港跑過兩仗,出賽經驗尚淺,今勻賽前由韋達親跳3課作調教,誠意肯定十足,而今早一課拉士愈走愈有,相信今戰必有驚喜演出!