你撐邊個拎冠軍?

2024年07月11日 19:44
東網電視
更多新聞短片
今屆冠軍練馬師之爭,要鬥到最後一日!剛剛谷草煞科,伍鵬志只交出1P,而連場搏殺的呂健威亦係交2亞2季贏唔到,現時最新形勢,伍鵬志成績係67冠54亞55季,呂健威成績則為66冠53亞52季,伍鵬志仍領先呂健威1W,計亞、季軍亦是佔上風,但去到最後一期,大家出盡法寶,隨時會有變數。
計牌面,威哥今次沙田煞科確是精銳盡出,一出即勝贏到對手冇得跑的「包裝天將」,亦再用上贏馬拍檔潘頓轉場再搏,而上屆香港拍賣會860萬標王「手機錶霸」,在軟地鬥輸畀「陽光勇士」後捲土重來,加埋「禪勝輝煌」、「好勁力」、「包裝福星」及「龍之輝」等好馬,威哥有望反先。
伍鵬志則有一場優勢,只要周日每贏多一場,呂健威要過頭就難度倍增,最有餐士係谷草轉來沙田的「美麗第一」,此馬上次谷草兜大圈加速仍得第3名,質高馬轉場未見下風,同場更有上次入Q回勇的廐侶「韋小寶」作雙保險。尚有初出第5名已有好走勢的「初戀」、最近試閘一放而回的「盈妍威楓」、剛剛谷草上名的「我做到」等,全部操足準備就緒。無論最終冠軍誰屬,兩位練者煞科必戰意鼎盛,馬迷一於買「志威馬房」獨贏及連贏過關!