【戰況R7】威哥絕地反擊！冠軍練馬師仲有價講！

呂健威絕地反擊！伍鵬志今日上半場起孖，威哥頓時處於極大劣勢，但佢手馬下半場先係絕強，去到第7場四班田草1400米，佢匹連場上名馬「遙遙領先」由布文換上潘頓，今次留放尺寸一絕，跟前走直路透出後，頂到尾壓下亞軍鵬哥匹「翹峯」及季軍丁仔匹「聚風雲」，「遙遙領先」出道第4戰終勝，助潘頓今日3捷，仲要幫威哥摘下寶貴1W！

贏到今季第67W嘅呂健威，追到只落後伍鵬志2W，佢一陣仲有好多實力馬出賽，未必一定輸梗！威哥賽後表示「遙遙領先」有質素，惟3歲馬整體未成熟，故閘廂問題需時改善，自己相信此駒隨住出賽經驗增多會愈跑愈好，馬匹性能方面，雖然今日贏1400米，但日後應可再扳長發展。

第7場賽果：2-1-7-4

二重彩賽果：2-1(最後賠率13)