全職湊仔騎癮難頂 湯普新太太返澳洲密謀客串

湯普新同太太Stephanie、囝囝Harry一家三口，响煞科後舉家飛返布里斯班放假充電，順道探望家人，而湯普新表示放假呢段期間，就唔會考慮响當地上陣，反而更重要滿足太太心願。由於太太係騎師出身，來港默默做阿Tom背後支持嘅女人，撐老公之餘仲要全職湊BB，Stephanie準備趁住今個假期，响當地復出客串騎番幾場。

湯普新表示，Stephanie原本產後已經復出，恰巧獲得香港賽馬會批准客串牌照，太太為咗支持來港發展決定，跑咗兩場就一同來港履新，至今太太一直都好嚮往騎師生涯，來港至今一段時間騎癮難頂，所以今次返國度假之餘，就想利用呢個空檔騎吓馬。

由於湯普新嘅外父Glenn Thornton係現任練馬師，响佢支持下，當然可以滿足Stephanie嘅要求，至於無諗住响祖家客串嘅湯普新，佢話稍後時間，會响岳父馬房幫手操馬，藉此保持運動量，操弗狀態迎接新季來臨。