今年唔夠雄馬撼　上流貴婦考慮跑蘭秀恰同輩

由高仕登父子訓練嘅明星馬「上流貴婦」(Emily UpJohn)，因為今季成績唔算突出，剛剛已經放棄咗出戰英皇錦標，起初練者就表示暫未有部署計劃，不過最新消息，呢匹馬大有機會，喺明日最後階段補充加入，出爭8月1日光榮古活賽期嘅蘭秀錦標。

「上流貴婦」今年成績遠比上季遜色，自從遠征杜拜司馬經典賽無功而還，返國迎接新馬季，喺皇家雅士谷衞冕加冕盃失敗後，一再與雄性馬匹場合硬撼都比下去，所以高仕登父子喺上場已經安排佢跑番同性別賽事，可惜於愛爾蘭嘅美寶莉錦標，又不敵「才情麗驥」，既然連雌馬賽都仲未可以敲響勝鼓，所以呢個星期六嘅英皇錦標再與雄馬同場交鋒，自然不作考慮。

若然「上流貴婦」於最後階段報名加入，屆時就好大可能，先同廐侶「旋進軌跡」內訌，後駒亦係今季無復當年勇，亦係兩連敗，包括上場嘅威爾斯親王錦標，兩匹明星雌馬都係力求翻身之作，又睇吓高仕登父子，於今屆蘭秀錦標將會點部署？