【世界觀】包義定讚金鎖充滿活力
2024年07月26日 19:00
東網電視
更多新聞短片
![](/bknrac/bkn/cnt/news/20240726/photo/bknrac-20240726190052803-0726_01002_001_01p.jpg?20240726190052)
包定義(圖片:Getty Images)
中國女遊客同英國皇家騎兵合照畀馬狠咬嘅影片,呢幾日響網絡上瘋傳,成為全球熱話。作為現代賽馬發源地,英國皇室一直同馬有着密不可分關係,早兩年離世嘅女王伊利沙伯二世,一生與馬結下不解之緣,唔單止憑馬賺到好多「私己錢」,更加係育馬專家,培育過多匹贏大賽嘅名駒,即使年過90仍樂此不疲,醉心鑽研馬匹配種。
繼位嘅國王查理斯三世,雖然唔似英女王咁全情投入賽馬,登基初期仲試過賣走14匹原本屬英女王名下嘅賽駒,不過大賽期仍然會經常見到佢同王后卡米拉嘅身影。響今次打正皇室旗號嘅英皇錦標賽馬日,身披紫色紅袖皇室專屬綵衣嘅「金鎖」,將會出戰S1-2瑪嘉烈公主錦標,呢匹兩歲馬女可以講係名副其實嘅Blue Blood,佢嘅媽媽Make Fast屬英女王名下,一出即贏6化郎處女賽,之後試過響表列賽跑過兩次第2名。退役之後,Make Fast順理成章成為皇室牧場嘅繁殖雌馬,響英女王悉心安排下,呢匹馬女至今誕4胎,除咗次胎之外,其餘3匹都識贏馬,其中出自「豪華房車」首胎Tactical,仲係G2冠軍。一直幫英女王打理呢系馬嘅包義定就話,「金鎖」係匹充滿活力嘅運動型賽駒,響春季曾經出現過阻滯,所以一度影響進度,重回正軌後狀態嚟得好快,如果今季贏唔到一、兩場頭馬,佢會覺得好驚訝。結果「金鎖」冇令包義定跌眼鏡,本月4日初出即輕鬆取勝,今次升格跑G3,睇吓可唔可以再下一城。