天公造美！4位倉主出席開操夏水禮

隨着機坪踱步圈於上周一重開，今早輪到大圈、內圈及彭福公園策騎徑揭開新季操練序幕，傳統的開操儀式亦於同日舉行，慣例當然要在烽火台附近的草地跑道，搵啲練馬師開吓香檳，預祝新季工作順順利利，馬會亦安排餐飲部員工到場預備小食及飲品，供現場人士享用，包括燒賣、叉燒包、牛角包及水果及橙汁等。

踏正7時正，除了羅富全、游達榮、賀賢及鄭俊偉共4位練馬師畀面抽空出席，容廐副練張漢威、黎廐副練馬譜鐘及沈廐副練蘇狄雄也代倉主撐場，並由跑道部及馬房部高層率領，一行14人齊齊在沙田馬場看台背景下高舉香檳影大合照，期間游達榮與賀賢拎住支香檳玩互噴，猶如玩緊夏水禮，相信兩個David係friend底，可幸落大雨前趕及完成儀式，完美演繹天公造美，在場人士皆大呼好運。