從練最後一季　容天鵬可圓大賽夢？

容天鵬喺今年12月踏入66歲，根據馬會最新嘅練馬師續牌規例，如無意外新季係鵬哥最後一季從練。然而從練11季，鵬哥至今未嘗任何大賽冠軍，僅憑「醒目名駒」於2015年打吡大賽，喺安國倫胯下跑入季席。

睇返容廐現時嘅賽駒，「風再起時」呢匹4歲澳洲自購馬絕對係鵬哥嘅打吡希望，此駒喺澳洲8戰2冠2亞1季，父系「正義」(Justify)係美國三冠馬王，贏馬路程1400至2400米，長力絕對唔係問題，依家評72分起步，只要進度理想，話唔定可以幫鵬哥圓夢。