【同日過關】呂健威試過3W過關8,644倍！

上季練馬師榜伍、呂大激鬥，而長期處於落後的呂健威，去到煞科日早段場次仍處下風，但當日出馬全攻型的呂廐，多匹實力分子都編於中後場次，唔少馬迷都睇好呂廐可絕地反擊，結果威哥真的在末段反先：第7場贏「遙遙領先」、第8場再勝「禪勝輝煌」、第9場「包裝天將」添勝仗，去到第11場全季最後一場賽事，呂廐2.2倍全熱門「手機錶霸」亦成功頂住千斤重擔，在布文胯下排眾而出，幫威哥完成季內唯一一次4捷，而呂廐頭馬數字亦以70W力壓69W的伍鵬志，首度登上冠軍練馬師寶座。

值得一提，呂健威上季4捷1次、3捷則多達5次，亦是各倉之首，其中2月15日威哥連爆3隻冷門，包括「上浦精選」22倍W、「迎樂」20倍W、「金發盛世」18倍W，3隻W過關乘埋冷到八千幾倍，馬迷若果買中真係發達！