【札幌直擊】何澤堯首匹坐騎即贏　雷神1.2倍倒灶

日本札幌競馬場今日(8月24日)起，一連兩日舉行日本世界星級騎師大賽，首日編跑進行12場賽事，而騎師賽首關及次賽事，分別喺第10及11場舉行。

今年香港有何澤堯同田泰安兩位騎師參加呢次騎師賽，何澤堯喺第2場兩歲馬1800米賽事率先上陣，最後策騎Laurel Orb，以11.8倍半冷門贏馬。而何澤堯唔止喺香港人氣高，去到日本都一樣，有馬迷拎住「金鎗六十」嘅相搵何澤堯簽名，但由於Vincent下場有坐騎，所以最後無簽到，而Win神響第3場嘅坐騎Jubilance，依然有上名機會，跑獲季軍。

至於今日頭場兩歲馬1200米賽事，由莫雷拉執韁嘅1.2倍大熱門Counter Seven，轉彎後一直保持領先優勢，但喺最後關頭被高杉吏麒策騎的次熱門3.3倍Lord Welt趕過，畀人打窒咗，先吃一記悶棍。