轉戰韓國適應快　馬雅跑至第三回合即開齋

馬雅於上月底告別星洲，飛赴韓國履新，展開策騎事業新里程，雖然提前報到，但因為等待工作證發出之後，延至上周末才能披甲，响首爾上星期打疊六、日賽期，雖然無馬贏，但兩日跑咗9場賽事，就有2亞3季成績，上名率奇高。

嚟到呢個星期，首爾繼續打疊賽期，馬雅呢一輪雖然策騎聘約唔多，但係就充份把握機會，响昨日賽事雖然只得3匹坐騎，第二場首匹坐騎出自練馬師安炳基嘅Khan Max，响呢場6班1200米沙地賽事，就成為佢响韓國發展嘅開齋頭馬，大勝對手4身位而回。

今日馬雅坐騎唔多，只得第6場一匹坐騎，呢場五班1200米沙地賽事之中，馬雅策騎由朴潤圭訓練嘅Austin Leader，响呢場10駒出戰場合，雖然未入三甲，仍跑獲一席殿軍，為馬主爭取到獎金收入。