冠軍威拜神　周嘉儀嚟撐場

今日6個馬房拜神，剛季首做冠軍練馬師嘅呂健威，馬房人氣沸騰，何澤堯同賀銘年陪住馬主陳家樑探「金鎗六十」班，賀銘年都有份餵老馬王食嘢呀，當然有得餵冇得騎喇(笑)。是日仲見到張基陪住文壽強嚟，文生出錢出力，包辦今次費用。文壽強話佢隻新馬K126聽日先返沙田入呂廐，而前女主播周嘉儀都有來撐場，Venus透露愛駒「天下寵兒」現時仲喺從化度緊假；仲有，希威森特登入馬格玩「包裝必勝」，隻馬跑開鑼日特首盃一班草地1200米。「水晶酒杯」馬主陳德華都有嚟探班，尚有潘一哥潘頓亦有畀面出席，呂廐仲同從化倉同步拜神，席間副練薛順強開live同從化手足一齊夾時辰呀。