贏夠1000W　杜苑欣爆終極目標係…

要數近年名氣最響嘅英國女騎師，肯定係神鵰俠侶之一嘅杜苑欣，呢位27歲好手，尋晚喺古活馬場寫下策騎生涯新一頁，憑沈國基馬房嘅Leyhaimur贏出一場1200米賽事，獲得出道至今第1000場勝仗，意義重大，難怪騎者賽後心情非常興奮。

接受當地傳媒訪問時，杜苑欣坦言當初出道時，從無諗過能夠贏到咁多場頭馬，因此非常感激各練馬師、馬主同埋佢嘅經理人，一直對佢嘅支持，依家佢可以諗吓幾時能累積下一個1000W喇。

杜苑欣現時累積39場分級賽及表列賽勝仗，並於2020年憑勇奪英國冠軍短途錦標嘅「塞爾河谷」(Glen Shiel)攞到個人首項G1，而「凌雪飛」(Nashwa)就為佢帶來首場英國經典賽頭馬，佢話絕對唔會忘記呢兩場勝利。作為騎師，杜苑欣透露當然想贏更多G1，而佢嘅終極目標就係成為冠軍騎師，即使並不容易做到，仍會盡力而為。另外，如果計埋冬季賽期，杜苑欣今年頭馬數目已贏100場，亦係佢連續6年達到呢個數字，表現出色。